УРЬД ШӨНИЙН ЗҮҮД

Уугаагүй айраг зөндөө үлдсэн байна
Үхэж болохгүй.
Учраагуй тохиол зөндөө олон байна
Өтөлж болохгүй.
Гараагүй оргил зөндөө олон байна
Цуцаж болохгүй.
Хараагүй одод зөндөө олон байна
Аньж болохгүй.

*        *       *

Дуулаагүй дуу зөндөө олон байна,
Хоолойгоо гамна.
Туулаагүй тал зөндөө их байна,
Унаагаа гамна.
Биелээгүй хүсэл дэндүү их байна,
Сэтгэлээ гамна.
Эдлээгүй жаргал хавьгүй их байна,
Биеэ гамна.

*        *       *

Галд хийгээд улайсгаж байх шиг
Сорогдож байна.
Гантай хуурайгаар үрж байх шиг
Зорогдож байна.
Галзуу юм шиг зүтгэсээр яваад
Хорогдож байна.
Гачлант хорвоог мэдсээр хэрнээ
Хоргодож байна.

*        *       *

Хонхор мөртлөө далайн түвшнээс дээш газрыг уул гэх үү?
Хорьтой мөртлөө далан настнаас хоцорч сэтгэгчийг залуу гэх үү?

ЖИРГЭЭ МӨРҮҮД

Авхаалжтай эрд архи цутгавч дийлдэхгүй 
Арчаагүй эрийг рашаанд угаагаад ч өөдлөхгүй...

Өөртөө итгэлтэй хүнд 
Өндөр уул ч дов мэт харагдана... 
Өөртөө итгэдэггүй хүнд 
Өвсний толгой ч жад мэт үзэгдэнэ...

Онгод хийморьтой эрийн үйлс 
Согтуу явахад нь ч бүтэлтэй... 
Олхиогүй эрийн ажил амьдралд 
Бурхан тусалсан ч бүтэлгүй...

Алтан ууланд эзэн суух гэж 
Амиа золин зүтгэж явсангүй... 
Алдар хүндийн боол болж 
Алтан шороор дөрлүүлж явсангүй...

Буян хичнээн бодлоо чиг 
Бурхан шиг явж чадсангүй... 
Бузраас хичнээн зугатлаа чиг 
Бусдын жишгээс гажсангүй...

Аяга тагш юм балгасан ч 
Амьтнаас нуух гэж зүдэрч явсангүй 
Сэтгэлийн дарамтаа шилгээж явсан ч 
Шилний ёроол руу унаж явсангүй

Хорвоогийн жамыг үл ухан

Хомхой сэтгэлийн боол явсаар

Хойд насандаа нохой болон төрвөөс

Хооллох идүүр чинь алтан байгаад ч яах юм билээ. /2013.07.08/

БОГИНО МӨРТҮҮД

Төрөхийн цагт хорвоог ээжийнхээ сүүгээр зөөллөв

Туулахын цагт амьдралыг ханийнхаа хайраар зөөллөв

Төгсөхийн цагт орчлонг үрсийнхээ жаргалаар зөөллөнө.

*           *          *

Дарсанд согтож үзээгүй хүний сэтгэл хатуу

Дурлалд согтож үзээгүй хүний сэтгэл хүйтэн.

*           *          *

Шилэн лонхны доторх 

Шингэн амтанд живмээр байна

Шилэн цонхны цаадах шингэн дуунд

Шингэмээр байна.

*           *          *

Дээдсийн хүрээлэн дэх ноёдтой

Тэрсэж амьдрах тэнхээтэй бай

Дэргэдээ байгаа хүнийг

Энэрч амьдрах сэтгэлтэй бай

*           *          *

Зэрэглээт говийн салхи залгилсан

Зэрлэг хулангийн азарга шиг яваад

Зээрийн янзага шиг бүлтгэрхэн охинд

Зэлтэй унага шиг уягдан үлдэв ээ.

*           *          *

Эзэд ноёдын харшид хоригдсон

Эрхэмсэг хатагтай нэртэй явснаас

Эрчүүдийн өвөрт шидийг үзүүлэгч

Эрх чөлөөтэй янхан бай.

МӨНГӨ БА БУСАД: ЦЭЦЭРХЭЛ БА АЖИГЛАЛТ

Тайлбар: "Ц" - цэцэрхэл, "А" - ажиглалт

А: Мөнгөөр авсан бүхэн мөнгөтэй хамт дуусдаг.
Ц: Санаандгүй явсаар салаа замын уулзварт ирэв. Аз жаргалтай амьдрал хөөх үү, аль эсвэл      
     мөнгө хөөх үү?
Ц: Хэрэгцээ мөнгийг тодорхойлдоггүй, мөнгө хэрэгцээг тодорхойлдог.
Ц: Хэрэгцээний мөнгө гэж байдаггүй, мөнгөний хэрэгцээ гэж байдаг.
Ц: Амьдралын төлөө мөнгөө үрэх үү, мөнгөний төлөө амьдралаа үрэх үү?
А: Их мөнгөний цаанаас нөхөр, дайсан хоёрыг ялгах боломжгүй.
Ц: Орчлонгийн бүх зүйлийг мөнгөөр худалдаж авахын тулд эхлээд орчлонд заяасан    
    бүхнээрээ мөнгийг худалдан авах хэрэгтэй болно.
А: Мөнгөний хамгийн чухал үүрэг нь үнэ цэн, үр дүнг хэмжих юм.
Ц: Мөнгө зорилго биш үр дүн байхдаа хамгийн сайхан харагддаг.
А: Мөнгө ухаантанд боолчлогдож, тэнэгүүдийг боолчилдог.
Ц: Эд зүйлсийн үнэ цэнийг мөнгөний тусламжаар тодорхойлдог, хүний үнэ цэнийг мөнгө
    өөрөө тодорхойлдог.
А: Мөнгө зарим хүнийг хөтөлж, зарим хүнийг дагаж явдаг.
А: Мөнгө хувирах чанар агуулдаггүй, харин хувиргах чанар агуулдаг.
А: Бага мөнгө амьдралд хүрэлцэхгүй үрэгддэг, их мөнгөнд амьдрал хүрэлцэхгүй үрэгддэг.
Ц: Бурхнаас заяасан савыг юугаар дүүргэх нь таны хэрэг. Гэхдээ хог новшоор дүүргэснээс
     хоосон байлгасан нь хавьгүй дээр гэдгийг санаж яв.
А: Албан тушаал хэдийчинээ өндөр байна, араас дагагчид төдийчинээ олон байна. Амьдралд ч
    тэр, твиттерд ч тэр.
Ц: Сайн морьтой явах өдрийн жаргал, сайн ханьтай явах насны жаргал.
А. Хүний ухааны хэмжээ ба мөнгөний хэрэгцээ хоёр нь урвуу хамааралтай байдаг: Хүн
     хэдийчинээ их ухаантай байна, түүнд мөнгө төдийчинээ бага хэрэг болно.
Ц. Их менгетэй болохын тулд их ухаан хэрэггуй, их шунал хэрэгтэй.